Universiteti “Ukshin Hoti” Prizren ka shënuar një tjetër sukses në procesin e sigurimit të cilësisë, me akreditimin e dy programeve studimore të Fakultetit të Filologjisë nga Këshilli Shtetëror i Cilësisë.

Sipas vendimit të marrë në mbledhjen e 151-të të Këshillit Shtetëror të Cilësisë, të mbajtur më 16 qershor 2026, janë akredituar programet:

• Gjuhë dhe Letërsi Angleze, BA – Fakulteti i Filologjisë
• Gjuhësi Aplikative, MA – Fakulteti i Filologjisë

Programi Bachelor në Gjuhë dhe Letërsi Angleze është akredituar për një periudhë pesëvjeçare me kuotë prej 100 studentësh, ndërsa programi Master në Gjuhësi Aplikative është akredituar për një periudhë trevjeçare me kuotë prej 20 studentësh.

Ky vendim përfaqëson një vlerësim të rëndësishëm të cilësisë së programeve studimore dhe të përkushtimit institucional për ofrimin e arsimit të lartë sipas standardeve bashkëkohore akademike. Akreditimi konfirmon angazhimin e Universitetit “Ukshin Hoti” Prizren në zhvillimin e vazhdueshëm të ofertës akademike dhe në përgatitjen e kuadrove profesionale të nevojshme për tregun e punës dhe shoqërinë.

Rektori i Universitetit e ka vlerësuar këtë arritje si një tregues të qartë të punës dhe përkushtimit të stafit akademik dhe administrativ në avancimin e cilësisë dhe krijimin e programeve konkurruese.

“Akreditimi i këtyre programeve dëshmon përkushtimin tonë të vazhdueshëm për të ofruar studime cilësore dhe mundësi të reja akademike për studentët. Ky sukses është rezultat i punës së përbashkët të stafit akademik, administrativ dhe të gjithë kontribuuesve në procesin e akreditimit”, ka theksuar rektori.

Universiteti “Ukshin Hoti” Prizren uron Fakultetin e Filologjisë, stafin akademik dhe studentët për këtë arritje, e cila kontribuon në forcimin e mëtejmë të cilësisë akademike dhe reputacionit institucional.