Universiteti i Prizrenit është bërë pjesë e konsorciumit fitues të projektit KOSMIC – Kosovo Micro-Credentials for Higher Education Innovation in ICT, i financuar nga Komisioni Evropian në kuadër të programit Erasmus+ Capacity Building in Higher Education (CBHE). Projekti synon të mbështesë modernizimin e arsimit të lartë në Kosovë përmes krijimit të ekosistemit të parë kombëtar të mikrokredencialeve në fushën e Teknologjisë së Informacionit dhe Komunikimit (ICT).

KOSMIC bashkon një konsorcium prej 11 partnerësh nga Kosova, Portugalia dhe Greqia, duke përfshirë universitete, institucione publike, agjenci të sigurimit të cilësisë, organizata të industrisë dhe partnerë të sektorit privat.

Projekti do të krijojë kornizën e parë kombëtare për mikrokredencialet në Kosovë, të harmonizuar me Rekomandimin e Bashkimit Evropian për Mikrokredencialet (2022), Kornizën Evropiane të Kualifikimeve (EQF) dhe Standardet dhe Udhëzimet Evropiane për Sigurimin e Cilësisë (ESG). Gjithashtu, do të zhvillohet një platformë kombëtare për lëshimin dhe verifikimin e kredencialeve digjitale, e bazuar në European Digital Credentials for Learning (EDC) dhe Open Badges.

Një nga rezultatet kryesore të projektit do të jetë zhvillimi dhe pilotimi i 15–20 mikrokredencialeve në fushën e ICT-së, të hartuara në bashkëpunim me punëdhënësit dhe të orientuara drejt aftësive më të kërkuara në tregun e punës. Projekti do të forcojë kapacitetet e institucioneve të arsimit të lartë dhe ofruesve të arsimit dhe aftësimit profesional për zhvillimin e programeve fleksibile, modulare dhe të bazuara në kompetenca, duke promovuar mësimin gjatë gjithë jetës dhe rritjen e punësueshmërisë.

Për Universitetin e Prizrenit, pjesëmarrja në projektin KOSMIC përfaqëson një mundësi të rëndësishme për të kontribuar në modernizimin e arsimit të lartë, forcimin e bashkëpunimit me partnerët evropianë dhe zhvillimin e programeve inovative që u përgjigjen nevojave të tregut të punës dhe transformimit digjital.