Në kuadër të aktiviteteve akademike dhe kulturore të Fakultetit të Filologjisë, Universiteti “Ukshin Hoti” Prizren pati kënaqësinë të mirëpresë shkrimtarin Pashko R. Camaj, autorin e romanit Brenga, në bashkëpunim me Shtëpinë Botuese Onufri.

Vizita nisi me një takim zyrtar në zyrën e Rektorit, Prof. Asoc. Dr. Mentor Alishani, i cili i mirëpriti mysafirët dhe shprehu vlerësimin për veprën letrare dhe për rolin e letërsisë në ruajtjen e kujtesës historike dhe kulturore. Në këtë takim morën pjesë autori Pashko R. Camaj, Bujar Hudhri, përfaqësues i Shtëpisë Botuese Onufri, si dhe bashkëpunëtorë të autorit. Nga Universiteti “Ukshin Hoti” ishin të pranishëm Rektori Prof. Assoc. Dr. Mentor Alishani, Sekretari i Universitetit, z. Nexhmedin Krasniqi, si dhe Dekanja e Fakultetit të Filologjisë, Prof. Assoc. Dr. Vjollca Dibra.

Më pas, aktiviteti vazhdoi në ambientet e Fakultetit të Filologjisë, ku u organizua promovimi i romanit Brenga dhe një bashkëbisedim i hapur e shumë frytdhënës mes autorit dhe studentëve. Pas një fjale të shkurtër hyrëse për librin nga prof. Ilire Zajmi, u zhvillua një diskutim i ngrohtë me studentët e tre departamenteve: Gjuhë dhe Letërsi Angleze, Gjuhë dhe Letërsi Shqipe, Gjuhë dhe Letërsi Gjermane.

Në këtë bashkëbisedim, studentët si brez i ri që nuk e ka përjetuar diktaturën – u njohën përmes letërsisë me ngjarje, dilema morale dhe përvoja njerëzore të një periudhe të errët historike, të trajtuara me ndjeshmëri të veçantë në romanin Brenga.

Ngjarja u pasurua edhe me pika artistike që krijuan një atmosferë të veçantë emocionale:

• Studenti Dorart Kryeziu interpretoi me kitarë instrumentalen e këngës “Baresha”,
• Djellza Perteshi lexoi poezinë “Republika” të Bes Camajt,
• ndërsa Dren Braha interpretoi letrën e Markut drejtuar Toninit, fragment kyç nga romani, e cila preku thellë publikun e pranishëm.

Si vazhdimësi e këtij bashkëpunimi të suksesshëm kulturor dhe akademik, u shpreh gatishmëria për lidhjen e një marrëveshjeje bashkëpunimi ndërmjet Federatës Panshqiptare “Vatra” dhe Universitetit “Ukshin Hoti” Prizren, me synim realizimin e projekteve të përbashkëta në fusha të ndryshme akademike, kulturore dhe shkencore.

Fakulteti i Filologjisë mbetet i përkushtuar në krijimin e hapësirave të tilla dialogu, ku letërsia, kujtesa historike dhe edukimi i brezit të ri ndërthuren në mënyrë kuptimplotë.