Universiteti “Ukshin Hoti” Prizren pati kënaqësinë të mirëpresë një delegacion ndërkombëtar të bibliotekarëve dhe profesionistëve të informacionit në kuadër të simpoziumit ndërkombëtar të organizuar nga Biblioteka e SEEU, në kuadër të projektit Erasmus+ KA210 “Empowering Information Professionals: Digital Transformation through Collaboration between Turkey, Norway, and North Macedonia”.

Delegacioni përbëhej nga përfaqësues të bibliotekave universitare nga Maqedonia e Veriut, Kosova, Turqia, Norvegjia, si dhe nga përfaqësues të Fulbright dhe Peace Corps nga SHBA, të cilët zhvilluan një vizitë kulturore dhe institucionale në qytetin e Prizrenit.

Gjatë vizitës në universitet, mysafirët patën mundësinë të njihen më nga afër me aktivitetet akademike, funksionimin e bibliotekës universitare, proceset e digjitalizimit dhe mundësitë për bashkëpunim ndërinstitucional në fushën e bibliotekarisë, shkëmbimeve akademike dhe zhvillimit profesional.

Ky takim shërbeu si një hap i rëndësishëm drejt forcimit të lidhjeve ndërkombëtare dhe krijimit të partneriteteve të reja që kontribuojnë në avancimin e shërbimeve bibliotekare dhe transformimin digjital në arsimin e lartë.

Universiteti “Ukshin Hoti” Prizren mbetet i përkushtuar në zgjerimin e bashkëpunimeve me institucione vendore dhe ndërkombëtare, duke promovuar inovacionin, dijen dhe zhvillimin akademik.