Në Universitetin “Ukshin Hoti” Prizren, më 13 shkurt 2026, është realizuar vizita akredituese në kuadër të procedurës së akreditimit të programit Master “Edukimi dhe Mësimdhënia në Matematikë në Gjuhën Turke”, e organizuar nga Agjencia e Kosovës për Akreditim.
Gjatë vizitës, ekipi i ekspertëve ndërkombëtarë, në përbërje të Giga Khositashvilli, Hasan Çakır (online) dhe Juraj Bogat (online), ka zhvilluar një agjendë të detajuar takimesh me menaxhmentin e fakultetit, bartësit e programit, stafin akademik dhe administrativ, studentët, si dhe përfaqësues të punëdhënësve dhe palëve të jashtme. Procesi është koordinuar nga zyrtarët e KAA-së, Mimoza Dobra dhe Betim Sherifi.
Takimet u fokusuan në vlerësimin e cilësisë akademike të programit, sigurimin e cilësisë, kapacitetet infrastrukturore, kualifikimet e stafit, përfshirjen e studentëve dhe lidhjen e programit me tregun e punës. Po ashtu, ekspertët realizuan vizitë në hapësirat mësimore dhe infrastrukturore të fakultetit.
Në përfundim, u mbajt takimi mbyllës me menaxhmentin e fakultetit dhe udhëheqjen e programit, ku u diskutuan gjetjet paraprake dhe hapat e mëtejmë të procesit të akreditimit.
Universiteti “Ukshin Hoti” Prizren mbetet i përkushtuar në avancimin e cilësisë akademike dhe në përmbushjen e standardeve kombëtare dhe ndërkombëtare të arsimit të lartë.